Tinabla ng Malacañang ang hirit ni Senadora Imee Marcos na i-overhaul ang Inter-Agency Task Force (IATF) dahil tila wala naman umanong nagawa ang IATF sa loob ng nakalipas na isang taon para malutas ang problema ng bansa sa COVID-19 pandemic.

Sinabi ni Presidential Spokesman Harry Roque na taliwas sa paniwala ng senadora, napakarami na ang nagawa ng IATF kaya naging minimal ang bilang ng mga namatay na pilipino sa COVID-19 kung ikumpara sa ibang mayayamang bansa.

Kung hahanapin ang Pilipinas aniya sa world statistics ay pang-67 sa case fatality rate, habang pang-30 naman sa bilang ng mga aktibong COVID cases.

“Ito po ang nagawa ng IATF. Kung hindi po siguro naging vigilant ang ating Presidente at ang IATF, we would be in a worst position today,” ani Roque.

Kung tumaas man ngayong buwan ang kaso ng mga nagkakasakit sa COVID, sinabi ng kalihim na may kinalaman ito sa pagsulpot ng mga bagong COVID variant.

Sinabi ni Roque na marami ang natutunan ng mga Pinoy sa nakalipas na isang taong pakikibaka sa COVID-19 at naging bahagi na ng kanilang buhay ang pagsusuot ng face mask, face shield at pagsunod sa social distancing. (Aileen Taliping)

The post Hirit na balasahin ang IATF tinabla ng Palasyo first appeared on Abante TNT Breaking News.

Source: Abante (https://tnt.abante.com.ph/hirit-na-balasahin-ang-iatf-tinabla-ng-palasyo/?utm_source=rss&utm_medium=rss&utm_campaign=hirit-na-balasahin-ang-iatf-tinabla-ng-palasyo)