Gagamitin ng Department of Health (DOH) ang mga bakanteng kuwarto ng National Center for Mental Health (NCMH) para mapunan ang kakulangan ng mga ospital sa ina-admit na mga pasyenteng tinamaan ng COVID-19.

Ito ang inihayag ni DOH Undersecretary Leopoldo Vega na siya ring chief ng One Hospital Command Center sa press briefing sa Malacañang.

Sinabi ni Vega na maraming bakante sa NCMH kaya inayos na nila ito para sa mga tinamaan ng COVID-19.

Mahigit 900 na COVID patient ang maaaring magamot sa NCMH.

“Naayos po namin ang National Mental Health na mayroong 3,500 beds. This is the biggest DOH facility at 1,000 ho bakante. Noong Sabado ho inayos namin, yung isang pavilion can accommodate 200-250 beds at yung pangalawang pavilion mga 700 plus, so ang total mga 960 beds for mild and moderate COVID cases,” ani Vega.

Sinabi ni Vega na malaking bagay ang nabanggit na bed capacity lalo na at mataas talaga ang mga tinatamaan ng COVID-19 sa Metro Manila.

“Between 400-500 lang ang okupado. Kaya malaki ang sa tingin namin na puwedeng gamitin yung NCMH. Nakita namin na maaaring palawakin yung number of beds lalong-lalo na sa mild and moderate cases,” dagdag pa ni Vega.

Mayroon pa aniyang mga bubuksang pasilidad sa Subic, Zambales na malaki ang bed capacity para matugunan ang kakulangan sa health capacity sa Meto Manila dahil sa COVID-19.

The post Nat’l mental hospital gagamitin para sa mild COVID case first appeared on Abante TNT Breaking News.

Source: Abante (https://tnt.abante.com.ph/natl-mental-hospital-gagamitin-para-sa-mild-covid-case/?utm_source=rss&utm_medium=rss&utm_campaign=natl-mental-hospital-gagamitin-para-sa-mild-covid-case)