Pinuna ni House Deputy Speaker Bernadette Herrera ang kabagalan ng Food and Drug Administration (FDA) sa pag-apruba sa mga aplikasyon ng mga pharmaceutical companies na nais gumawa ng murang gamot para sa mga chronic diseases gaya ng diabetes at hypertension.

Sinabi ni Herrera na mayroong mga nag-apply ng permiso sa FDA para makagawa ng generic na gamot noong Disyembre 2019 at hanggang ngayon ay hindi pa rin naaprubahan.

“Why is the FDA taking so long to approve these generic drugs when it knows for a fact that the timely availability of these medicines would increase affordability for many Filipinos?” tanong ni Herrera.

Ang mga generic ay murang bersyon ng mga branded na gamot na ang presyo ay 30% hanggang 40% na mas mababa.

Mula Disyembre 2019 hanggang Hulyo 2020 ay may mga inihaing first-time generic applications sa FDA para sa paggawa ng ivabradine, rivaroxaban, dapagliflozin, ticagrelor, mecobalamin+pregabalin, canagliflozin, at tenofovir alafenamide.

Ang dapagliflozin at canagliflozin ay gamot sa diabetes samantalang ang tenofovir alafenamide ay gamot sa chronic hepatitis B infection at iba pang sakit sa atay. Ang iba pang nabanggit ay gamot na panlaban sa stroke, heart attack at blood clots.

“If FDA prioritizes release and evaluation of products like these, there will be more choices of medicines in the market,” dagdag pa ni Herrera. “More options means lower cost.”

Ipinunto ni Herrera na ang mga produktong ito ay hindi na bago kaya dapat ay hindi na abutin ng matagal ang pag-apruba sa aplikasyon ng mga nais gumawa ng mga gamot na ito. (Billy Begas)

The post Solon pinuna FDA sa kabagalan ng pag-apruba ng gamot kontra diabetes, hypertension first appeared on Abante TNT Breaking News.

Source: Abante (https://tnt.abante.com.ph/solon-pinuna-fda-sa-kabagalan-ng-pag-apruba-ng-gamot-kontra-diabetes-hypertension/?utm_source=rss&utm_medium=rss&utm_campaign=solon-pinuna-fda-sa-kabagalan-ng-pag-apruba-ng-gamot-kontra-diabetes-hypertension)