Nanindigan ang Inter-Agency Task Force sa desisyong kailangang sumailalim sa RT-PCR test kada dalawang linggo ang mga empleyado na ayaw magpabakuna.

Sinabi ni acting Presidential Spokesman at IATF Spokesman Karlo Nograles na status quo ang IATF resolution dahil walang direktiba mula kay Pangulong Rodrigo Duterte na bawiin ang nakasaad sa resolusyon.

Ang RT-PCR test aniya ay para sa mga manggagawang on-site sa trabaho dahil isinaalang-alang ang kaligtasan ng mga kasamahan sa trabaho.

“Wala pong pagbabago iyan and sagot po ng empleyado kung hindi siya vaccinated. Iyon po ang current guidelines, di pa nagbabago iyan at wala pong directive otherwise. So we will have to follow that directive,” ani Nograles.

Inalmahan ng grupo ng mga mangagawa ang direktiba at hiniling sa Department of Labor and Employment (DOLE) na sagutin ng gobyerno ang RT-PCR test.

Gayonman, sinabi ni DOLE Secretary Silvestre Bello III na wala pang sagot si Pangulong Rodrigo Duterte sa hirit ng mga mangaggawa.

Sinabi ni Nograles na mananatili ang resolusyon ng IATF para sa mga manggagawang ayaw magpabakuna at alam na ito ng mga employer na siyang magpapatupad sa direktiba.

“Kung on-site na required yung empleyado tapos hindi siya vaccinated, then RT-PCR test. Kung hindi naman available iyong RT-PCR, pwedeng mag-antigen test,” dagdag ni Nograles. (Aileen Taliping)

‘Best of Sportalakan’ Sabong edition

The post IATF desidido sa RT-PCR test ng mga empleyadong ayaw paturok first appeared on Abante TNT Breaking News.

Source: Abante (https://tnt.abante.com.ph/iatf-desidido-sa-rt-pcr-test-ng-mga-empleyadong-ayaw-paturok/?utm_source=rss&utm_medium=rss&utm_campaign=iatf-desidido-sa-rt-pcr-test-ng-mga-empleyadong-ayaw-paturok)